仙樂都認Aaron曾幫襯 仲送平價錶 仙樂都

babigoh

「郭富城」呢個名，會否成為一眾0靚模上位捷徑？由熊黛林開始……到最近殺出嘅內地歌手模特兒AK葉熙祺，人人爭認係城嫂，最新發展，竟然係仙樂都!

故事發展，係話「近日有人爆料」(向雜誌)，原來城城曾經同仙樂都熟稔，二人友好程度，更達「登堂入室」階段。報道指，當時仙樂都從事護膚品直銷生意，經朋友介紹而認識城城，城城仲幫襯仙樂都買咗幾千蚊護膚品，仲話因為唔識用啲新產品，於是請仙樂都到寓所幫忙。報道係咁寫0架。

呢位知情人士仲話，城城為答謝仙樂都，城城送咗活動大會送嘅「情侶手錶」，將女裝嗰隻送畀仙樂都，但據知該手錶價值有限，仙樂都唔要。

噚日出街篇報道話，仙樂都大方承認曾上城城屋企做facial，仲表現得好「驚訝」咁話:「你點知呀？都係好耐嘅事，唔好再講啦，費事以為我揾佢嚟做宣傳啦!」哦哦哦，跟住又係咁啦，疑似新任城嫂AK葉熙祺回應啦，佢話:「垃圾嘅人，我唔會回應。」嘩，你寸邊個係垃圾？

咦，「垃圾論」呢三個字好，好耳熟，係喎，去年熊黛林趁自己32歲生日前夕，高調到城城家送外賣宿一宵，之後城城經理人小美喺微博留言：「垃圾和垃圾確實是配對的！」又係關城城事喎!!!

講番仙樂都，佢噚晚出席《波西傑克森.妖魔之海》首映時，就話喇:「好耐好耐之前就真係有送過(錶)，普通朋友情況下，私底下送畀我，好耐之前嘅事，唔好講喇。」記者問:「大約幾多年前？」仙樂都話:「好耐喇，耐到唔記得咗喇。」仙樂都話送嘅只係一隻普通手錶:「總之唔係一隻好名貴嘅手錶。」

仙樂都不斷強調同城城只係普通朋友咁交往，問城城有冇追你？佢就話:「其實佢個人，好好人嘅，好有君子風度，嗰陣我賣護膚品，佢幫襯咗我買一堆護膚品，我就解釋俾佢聽點樣用，同教佢點用，同埋幫佢做facial咁樣啫!」

呀仙樂都小姐口口聲聲叫大家唔好問，唔想提，但自己又越爆越多，話城城好好人，係為咗幫朋友而幫襯佢，等佢有生意而已。至於依家是否有聯絡？佢話:「好耐冇聯絡喇!」

至於被疑似新任城嫂AK指斥係「垃圾」，仙樂都就話:「個個人都係平等嘅，冇人係垃圾，因為天生我材必有用。」講到是否覺得AK自恃自己先有資格講城城？仙樂都忽然改口、將「城城」變成「阿王」(Aaron):「咁阿王好多朋友0架嘛，我覺得……冇話咩嘅……我又唔係講大話……佢覺得我垃圾新聞，我都冇辦法。」個樣真係好無奈呀。