官恩娜唔覺意自爆：有同男友影「甜蜜錫錫相」

TTK

官恩娜（Ella）今日到尖沙嘴出席電訊活動，佢喺台上話佢隻狗仔係佢男友喎，咁佢個醫生男友呢？Ella笑言自己好花心，有兩個男友，一個係狗仔，一個係醫生。

喂喂喂，狗仔男友都可以取代到男友咩？可以做到啲乜嘢先？Ella就笑謂：「可以呀，佢可以同我影甜蜜錫錫相，我從來冇嗰啲相公開0架嘛。」問佢意思係咪有同男友影過，只係冇公開？佢即話：「冇呀，冇影。」

Ella話男友一向怕上鏡，所以社交網只可分享嘅男性動物係狗仔，男友有冇呷醋？佢話：「呢個冇投訴，但因為自己太錫狗仔，係個狗癡，以前個男友就話我錫隻狗多過錫佢。」

至於聖誕點過？Ella話年年都好乖，今年想曳曳，諗住摵甩男友同同事去夜蒲，佢亦鼓勵男友都去夜蒲，各自去玩，佢話：「如果帶埋佢去好礙眼，佢同我一齊會比人望住，由頭望到落腳，唔想佢有不必要情緒影響。」問佢如果男友玩one night stand會點？佢即話：「我唔會知0架，佢唔會嘅，信得過佢。」






有地獄廚神之稱的官恩娜，即席整蛋糕。








官恩娜對男友有信心，所以聖誕節放心各有各玩。